Assalammu'alakum, keu mandum akhi,,
Seulaweut keu nabi, saidil ambiya,,
Haba calitra, pantoen loen rawi,,
Karong ngon wali , duson ngon kota,,
Neubri ya allah, beutroek hajati
Keu soal kropsi, hana pre masa,,
Dumnoe ka bala, neubri tsunami,,
Matong sit kropsi, meu rajalela,,
Rata jeut sagoe , tadeungoe kropsi,,
Lage sang sang hi , saboh budaya,,
Tamoeng keurija, peugawe neugri,,
Tamoeng polisi , atawa teuntra,,
Sinan na jatah, peujabat tinggi,,
Tamah famili, sogok mubura,,
Sogok meunyogok , sinan terjadi,,
Takalon ban hi, syit ka beasa,,
Yang leupah lucu , jinoe terjadi,,
Wate jibagi, subsidi desa,,
Teken lhee juta, dijok lhee tali,,
Bak kwitansi , yue cap bak desa,,
Nibak tingkat sa , phon phon terjadi,,
Lakee kumisi, yue bagi rata,,
Oh troek bak camat , deungon bupati,,
Administrasi , keunoeng biaya,,
Hanale teumpat, yang hana kropsi,,
Han kecuali , tamoeng phon tk,,
Bak bagi jadup, jatah peungungsi,,
Sinan pih kropsi , meurajalela,,
Bak bagi rumoh , barak peungungsi,,
Sinan hai akhi , pih saboh gura,,
Sogok menyogok, sinan terjadi,,
Supaya jibri , dua boh muka,,
Nibak bagi breuh, ngon teupong kanji,,
Jatah peungungsi , bantuan lua,,
Untuk saudara, jok dua guni,,
Untuk peungungsi , sep saboh saja,,
Padahai saban , korban tsunami,,
Pakon bak bagi , jatah meubeda,,
Hana amanah , ureung yang bagi,,
Meunyan pih kropsi, wahe saudara,,
Bak peugot surat, kanto polisi,,
Bak desa jibri, surat cap desa,,
Bak urus izin, kanto bupati,,
Camat keutahui, syarat jih beuna,,
Haroh tasurung, rata kurusi,,
Beulanja tabri, beurata meja,,
Meuhan han teubiet , rekomendasi,,
Izin han jibri, meutan belanja,,
Di pak kontraktor, pih laen hi,,
Ilah dicari , beuna keurija,,
Mita proyek , tender yue bagi,,
Disinan kropsi , bit kureueng aja,,
Meunyoe menang lon, PT. Tsunami,,
Negoisasi , lon jok beulanja,,
Siploh persen , keu pimpro lon bri,,
Tiket ek haji, inong keupala,,
Oh troek bawasda, KPK lagi,,
Dijak kumisi , deungon pareksa,,
Jok saboh amplop , ka teuhing gusi,,
Yue jak kembali, han pue pareksa,,
Meunan keuh bagoe, jinoe terjadi,,
Maka jeut kropsi , meurajalela,,
Keu peungadilan , jinoe lon kheun kri,,
Disinan kropsi , pih saboh gura,,
Pancuri manok , hukuman mati,,
Peujabat kropsi, bebah u lua,,
Meunoe ji puta , meudeh jiputie,,
Hansep bukeuti, alasan jiba,,
Peunutut umum, ngon hakim tinggi,,
Negoisasi , deungon terdakwa,,
Ngoen peungacara, yue ikat janji,,
Padum ek jibri, meunyoe lon bela,,
Yg na thei-thei droe, nibak kurupsi,,
Mandum beu gubri, asoe penjara,,
Neu pok-pok jaroe, meunyo gop kropsi,,
Han trep terjadi, karma meugisa,,
Hana jitupeu , hukuman kropsi,,
Hukom ilahi , tamong nuraka,,
Kupue guna le, peng hasil kropsi,,
Watee tamate, hana sit taba,,
Gafan lhee lapeh , meunyang na taba,,
Papeun keureunda, labang lhee inci,,
Harta tatinggai, sinoe didonya,,
Ditung pusaka , aneuk ngon wali,,
Tak kala mate , sidroe droe ureueng,,
Peut hoe geubulung , harta pusaka,,
Di ulat asoe , di bumoe tuleung,,
Teuma di ureueng , jitueng pusaka,,
Nyawong geupulang , milek Potollah,,
Meudi gata sah , hana sapue na,,
Malingkan yang na , amal ibadah,
Seudeukah jariah, masa lam donya,,
Etnoe keuh mantoeng, hai aneuek aceh,,
Haba yg teupeh, meu-'ah loen sigra,,
Kadang na gasa, haba uloen peh,,
Geutanyoeh saheh, bek na yg desya,,
(Swek spek)
